Idiris M. Cali / Maqaal / Masafo

Barashada iyo Bartaha

Heesta hoosta ku qoran waxa aan June 21, 2014 kaga qaybgalay xaflad-qalinjabineed (sanadguuradii sagaalaad) oo ka qabsoontay magaalada Boston—xafladdaas quruxda badan oo ay soo agaasimeen bahda SALSI (Somali Association for Literacy & Social Improvement). Heestu waa masafo, leh jaangoynta “heesta-maqasha.” Heestu waa masafo oo waxa ay u taxan tahay bayd-bayd (labo-labo-meeris). Waxa ayna dulucdeedu tahay: Weynayn la weynaynayo doorka bartaha ee waxbarashada.

Sida suubban, diinta na ku sugan, waxa ay heestu ku furmaysaa bisinka, mahadinta Eebbe, iyo ku-sallinta Rasuulka (NNKH). Tuducda xigta ayaan ku qeexayaa waxbarashada. Boohintiisa koobaad illaa iyo bud-dhiggiisa, waxbarashadu waa sad qof kastaa wax ku yeesho. Haddaba, waxa ay waxbarashadu hoy u tahay basar (hannaan) iyo aqoon, oo ay dadku uga baxaan jahliga daleesha ah. [Qof dhaxanta aan wax ka baran ma “hoy” buu yeeshaa?]

Ka dib waxa aan tuducda saddexaad ku sifaynayaa astaamaha bulbulka, kaas oo ujeeddada uu wax u barto tahay tiirinta wanaagga. Bulbulku waa xariif u taagan (oon u doortay inuu u taagnaado) waxbarashada lafteeda, maaddaama oo uu xariif ku yahay waxbarashada! Tuducda xigta waxay ka warramaysaa in qofka wax bartay uu bare u noqon karo dad wixii uu bartay sii baran kara, dugsi la’aan. Waayo, waxbarashada iyo barennimadu way ka baaxad weyn yihiin in dugsi (iskuul) lagu soo uruuriyo, oo waliba beeso uun lagu raadsado. [Qalinshubatadu saw meel kasta hunguri ka ma dayin?]

Waxa ay heestu ku soo xidhmaysaa farriin ku socota jiilasha hore ee bulshadeenna; farriintaas oo dulucdeedu tahay in bartayaasha maanta loo hagar-baxo, oo la ogaado qiimaha ay mustaqbalka ku fadhiyaan. Haddii ba aan bartayaashan waxbarashada lagu taageerin (duca na waa wax buuran e), sidee ayay u hanaqaadi karaan oo isaga dhawri karaan hogoggii (halista lahaa ee haybsooca, qabyaallada, isdilka, iwm ee) ay jiilashii hore ku hoobteen? [Qofka qashinkaaga kaa qubaya miyaa la xasdaa?]

Waa tan heestu (macnaha ereyada dugulka ah na hoosta ka eeg):

Magac Baydaraan, ku bilaabayaa
Boqorow Adaa, mahad buuxda lee
Baxsanaha Rasuul, naxariis u beeg
Inta raacday bili, iyo sii badhaadh

Barashadu naftay, ballaysimo u tay
Illaa laga bud-dhigo, qofna kama biddoo
Waxay buul u tay, basar iyo aqoon
Dadku baylah iyo, jahli uga ga baxo

Dadaal baaxad weyn, oo aan ba’ayn
Samiriyo buruud, balaayada duwiya
Xaqdhawriyo bisayl, saaxiib u bogo
Iyo waa “bashaash,” bulbul summadihiis

Bartayahow bal eeg, hadda beeso uun
Waxa loo bartaa, bulbul ma ba dhalaan
Noqo buunni bilad, ku mutaysta barid
Billaahiye bartow, ku gal ballan middaa!

Berritada aduu, ku baddalahayaa
Waxad bi’isayuu, wada baananoo
Taageero bad ah, waw baahanyee
Bulshayeey bartaha, ma u bixin kartaa?

MACNAHA EREYADA:

Baydaraan (Baydariga ayaan); Baydari: Al-Casiis (Eebbe). [Xirsi Magan Ciise, maan se xaqiijin!]
Biddoo (biddo oo); bidid: Buubto, duusho.

Il: WardheerNews ka Heeshi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s