C/laahi M. A. Dhoodaan / Gabay

“Galaalxoor”: Dhoodaan

Soomaalidu meelkasta oo ay ku nooshahay waxa ka dhaxeeya waa suugaan. Suugaantaasuna waxa ay aad ugu qurux badantahay maansada oo murti aan lalliicin karin lagu soo bandhigo, isla markaasna lagaga waramo isla xaalka taagan: siduu ku suurtoobay, kan soo socda mustaqbalkana u saamayn karo. Gabaygu waa summada taariikhda, sidaas ayuuna mar walba hadafkiisa ugu weyni ahaa, haddeerna yahay, ahaanayaana (IA).

[Dad badan ayaa u haysta in gabayga maanta kaalintiisaa ka maqanyahay, amaba gabayga laftiisu uuba dhintay ba! Balse waxa ay dadkaasu ka indho iyo dadaalba la’yihiin sida weli gabayga dad dhiig iyo dhuux yaqaanaayi u noolyihiin. Gabaygu ma dhinto, ee dadka ka gaabsada ahmiyadiisa ayaa isagoo nool aasa!]

Daliil waxa in gabaygu nool yahay u ah gabayga soosocda ee “Galaalxoor.” Gabaygan oo maahmaahyo isku daba taxan, oo runta ku qotoma, xambaarsan ayaa waxaa tiriyey abwaanka caanka ah ee Cabdullaahi Macalin Axmed Dhoodaan. Macallinku in badan ayuu ka nastay gabayadii qirada weynaa ee uu ummada Soomaaliyeed ku guubaabinayey, uguna cabirayey hilinka ugu muhiimsan ee ay ku wada sinmi karaan. Macallinku had iyo goor nabarka ugu weyn ayuu ku dhayidanqi¹ jiray gabayadiisa. Kolkeerna, gabaygan ujeedadiisu waa nabar xanuunkiisu adkaysi xamilli waayey oo uu gabyaagu ina wada dareensiinayo. Dareenka aan inoo muuqan karin ayaa se ah in la gorfeeyo arrinta uu gabyaagu ku tilmaamayo “gadgaddi saddexan”; labaduna inoo cadyihiin: gaylamaha iyo garabka dadka:

hadh ma geynin aayadi ninkii, hooyo gawracaye
nin se walaalki gaday meel shishaa, laga ganaaxaaye

Murtida iyo far-shaxanka gabaygu inay giigtirantahay adiguba waad ka markhaati kici. Faahfaahin maayo gabaygan, oo abwaanka ayaa inoogu faahfaahin doona JIIDMADAN. Haddaba gabaygan oo taariikhda maanta koobaya nala dhugta:

Geylame gafkiisuu bataan, geydhasho la’ayne
qosol gawsku muuqdaan u tagin, ciil gafuudin ahe
sidan kuugu gololeeyey waa, goonni baadh tanuye
saddex gees sagaalkana gudaan, kuugu gabaxsiine
goggobeysigeedaa afeef, kuu gol nuugsadaye
qofba kaalintuu uga goggobi, haw gunuunoco e

Maahmaahda waa toban gulcood, ii gadhoodhsanuye
gudcur raadki guuraha ku lumey, waaga galacdiisa
gadaal subaxi waw goobi jirey, ruuxa gurayaaye
xadhka gunudka waa laga gayoon, ay gammaamadiye
hadda wuxu u gabangaabsadaa, kay goddo’eyeenba
ee lagu gabood falay inuu, guul ku dhaashado e
waqaan talada goof nagaga jirin, garashadeeduuye
adigoon ujeedada gaddiyin, taa haddaad gudubto
soco waa galaalxooriddii, gaafaguursiga e

Wali garabki maahmaahda waan, soo gilgilayaaye
gundhadiyo haddii uu fadhiyo, caabuq gudaheeda
gunre iyo sammuutiyo haddaad, gawlilleba shiisho
wax mataro galiillaha ku dhoob, meel gunaadsanuye
gogga tuludda koon yeelatiyo, finan ku geyngeyman
cadho golosa neefkii qabee, saamo gaatira le
gaboodyaale naan lagu bogsiin, gorofya dhaymoodka
googaarre naan lagu daweyn, golona loo duubin
gaanaha intiisii kaluu, dib u galaaftaaye
adigoon ujeedada gadiyin, taa haddaad garato
soco waa galaal xooristii, gaafaguursiga e

Wali garabki maahmaahda waan, soo gilgilayaaye
wax la yidhi gamaartii lo’diyo, naag garaaf ihiba
iyagaa gibbaaniyo gabdhiyo, gees la koy dhala’e
oo gaameelo doofaarre iyo, uur gasley noqone
kac gardaadi wiil lama yidhaa, xaaduq gaamuraye
inuu gumarradiisii dhaxlaa, looga gudayaaye
kama yaro hoggaan gobannimaa, gaasa bixintoode
adigoon ujeedada gadiyin, taa haddaad garato
soco waa galaal xooristii, gaafaguursiga e

Wali garabki maah-maahda waan, soo gilgilayaaye
gubbiskii madow dhagaha way, ugu gammuuraane
waana geela bacowgiisi oo, loo gol leeyahaye
garruudkii hayin ahaa kolbuu, raran gubyoodaaye
gurgurshaa maroor loogu xidhey, caynka ganiciisa
kolba gibisha waa inuu ridoo, galangolcoobaaye

Ninkii gura dameer fuuli jirey, meydal garab weyn ah
goorada hadduu kaga dagoo, guudka kaga boodo
oo gacanta kor u baaciyoo, gaw ul kaga siiyo
oo muquuska dib u giijiyoo, gulubi-keydeeyo
gasariiriddaasuu xarraan, jara gariiraaye

Wali garabki maahmaahda waan, soo gilgilayaaye
galsha miiradkii laas biya ah, kii u godan waayey
garraw adag gamaad kama qotiyo, gaan u maaxsamiye
wax galool anfici waayey iyo, gob iyo noociisu
fuley baa gargaar kuugu noqon, giirka haw fidhane
adigoon ujeedada gaddiyin, taa hadaad garato
soco waa galaal xooristii, gaafaguursiga e

Wali garabki maahmaahda waan, soo gilgilayaaye
gab kolkuu dareenkii noqdee, gagi bannaan seexdo
rag gadmadiyo geeriyoo dhurwaa, gama’a deystaaye
gadawgaan ku taabsiiyay iyo, meel gaddaanka ehe
iska giiji waan kugu gunneyn, geedigalintaase
ha gawdh-gawdhin taan kugu gadh-wado, sida gandaalkiiye
u gurguri sidii gaaridoo, garawga haw daynin

Wali garabki maahmaahda waan, soo gilgilayaaye
hadh ma geynin aayadi ninkii, hooyo gawracaye
nin se walaalki gaday meel shishaa, laga ganaaxaaye
gedgedigaa saddexan baan rabaa, inad gorfaysaane
carrab li’idu waa sida gangada, nooc gaddiisa ahe
gurra cuniddu maankey u geyn, fiiro xaan gab ahe
gamaalaa gurdeyntiyo xurmadu, waa labays gaya e

Wali garabki maahmaahda waan, soo gilgilayaaye
nin gurrani hashuu dheelmo wey, baalla gubataaye
gulcubaha Allaa toosin kara, gabar malaasnaaye
wax guurguuranayaa ma jilo, goodir booddadiye
ninna gorayo iiguma sawiro, garigii yuubnaaye
gabsasteyba nagu leeyihiin, geel ka xoog badane

Wali garabki maahmaahda waan, soo gilgilayaaye
eey duur gala timaa guf ihi, wey ka go’ayaane
dabeecaddu se kama guurto iyo, goon jabkuu qabaye
waxaan maqallay gabadh tuugsatoo, baahidu u geysay
kolkuu taajir guursaday ma deyn, gorof la meerkiiye
guddi dhaqan leh iyo guurti iyo, goliyo xeerbeegti
gablan uma horseedaan daday, gacal u sheegtaane
garangoorri buu kugu noqdoo, wuu ku gubayaaye
dhaqan bey usoo gororsaniyo, faallo giig tirane

Wali garabki maahmaahda waan, soo gilgilayaaye
Giriyaad bannaaniyo adoo, meel gayaca taagan
gabbaad dhaxanta kaagama noqdaan, geedo kaa fogiye
gudahaan ka soo darey okhole, galixi ooyoode
dushaan gaawihii oo gingiman, kuugu soo ganaye
mana gabi dhacaayee biyaha, gacantu yey daadin

Dibigii ku soo galay lo’duu, gees ku kicaayaye
Somaalidana qaar baa la gan ah, oo geddiisa ahe
nin la gagey gammaaniyo ha koro, geenyo fadal dheere
orod baan garmaameynayaa, duhur gadiidkiise
ha gofleyso sheekee waxaan, gaadi baa jira e
iyadoon gaboobeynin oo, gamashi daaqii leh
yaan soo gufaadhaye murtida, kaama gaasirine
gufaacada anaa soo gabrayee, maanan gocoyeyne
galshax baan ku dhaadhsiiyey iyo, gaagur malabkeede
gallad mooyi saad uga naqiye, gaadeshaan huraye
hadii fahanku kaa gaws qabsado, saan isugu gaarey
geyey iyo gabiir ayna jirin, haw gunaanadine
waxay kuugu geeddami qof geya, inad u geysaaye

Si gurracan hadaad gabayadaa, ula gawaan raacdo
golxobbay murtidu yeelan iyo, leeb gammuunna ahe
mana weydo guutooyin iyo, gaasas daafaca e
war yaan xeel gagaabani ku badin, goobbo iyo tuure
ka gud bohosha yuu leydh gurxamay, kugu galeydhyayne

Godoloo u gaalgaala iyo, waa galoof tanida
gayaxdiyo ma goofaadhidiyo, shaley garruumeedda
galgaal iyo abeer laba gogliyo, goolal iyo qaalmo
neef guduudan iyo mey gardho leh, goodir iyo aydin
ma gab riminnin way goojisiyo, wuu gadaal rimiyey
galabtuu cabbaar gororsadiyo, wuu ka daba goohay
awr gulaan ahbaa guux la kacay, oo gulgula weyn leh
midkaa giih le doobtii gilgillay, galawgi baa foodhyey
gudun laana xero goodayoo, bawd giraan giriyey
sidaa gibinta oo weedh guntana, hadalladaa geela
gabeyga u gungaadh waa gaddaa, gocoshadiisuuye
maansadaa argoof iyo ganaax, gabagabaynaysa
ma guddoontey googgaa sidaad, iila garataane

~~~
Gabygan waxaan ka soo xigtay mareegta EEGGA.COM inkastoon xoogaa ka badalay qaabka. Sida aad garan kartaanna, isma waafaqayaan sida abwaanku u tirinayo, iyo sida gabayganu u qoranyahay—waxana jira dhawr bayd oo qoraal ahaan aan muuqan.

Sidoo kale, waxaan gabaygan ka saxay Axmed, waana ku mahadsan yahay.

__________________________________________
Miisaanka (Tusmada) Guud ee Meerisyada Maansadanu waa:

W W V W W V W, W V W W V

11 thoughts on ““Galaalxoor”: Dhoodaan

  1. Salaamu Caleykum.. Waad ku mahadsantahay Gabaygan aad soo daabacday iyo hordhacaba… , Inkastoon Xiligaa laftigeygu joogay JigJiga aana ka war hayay safarka uu abwaanku ku tagay Gobolka Nogbeed, Magaalada Fiiq.
    – Sababta Muuqalka Videoga iyo isu Qaban layihiin xarfaha gabaygu , waa Gabayga oo Horaan baa loo duubay, Dhowr week ka hor saan filayo. Marka waa macquul inuu Dhowr meeris iloobo amaba ka boodo. Isagoo Cod ah weey aheyd inn BBC laga soo daayo iyo interview abwaanka la rabay in lala yesho, Iney suurto gasheyna war umahyo…
    Salaamu caleykum

  2. Waan ku salaamay Xuseen,

    Walaal aad ayaad ugu mahadsantahay sharraxaadaa kooban een sida qotada dheer u baadi goobayey. Waa runtaa oo way dhacdaa in gabaygu marka uu soo baxo (ee cajalka koobaadi qabto) iyo marka uu fagaare joogaba kala duwanaan karo — ahmiyaddii laga doonaba ha lahaadee.

    Mahadsanid,
    Jidhidhico.

  3. Haa sxb, eegga unbaan usii fiirsaday gabayga marlabaad oon dhageystaye, Ileen gabaygu Sadexluu ahaa, Tuducyada dhamaadka yaan ka gartay, bal ila fiiri adna.
    Cajiiib weeye walee.

  4. Shaqsi ahaan anigu waxaaban aaminsanaa, In Suugaanta Soomaali soo martay uu Qamaan Bulxan uu yahay Gogol-dhiga Maah-Maahda Gabayada ku dhex jira.
    Laakiin Dhoodaan baa si fiican uga daba fulay Qamaan, Oo isna Title kii ku soo caan baxaya.
    Gabayguna waa gabay culus oo kuwii horray loo tiriyay geyiga soomaaliyeed iyo kuwo dib loo tiriyaba, Meel banaan kaga soo hadhay.
    (Garruudkii hayin ahaa kolbuu, raran gubyoodaaye /Gurgurshaa maroor loogu xidhey, caynka ganiciisa / Kolba gibisha waa inuu ridoo, galangolcoobaaye)
    Bal culeyska halkaa ka gariirayaa arka

  5. Buubaal waan ku salaamay,

    Walaal waa runtaa, oo gabayganu waa gabay culus, qarnigan bilowdayna waxa uu u yahay hog ay gabayada dambe ka dab qaataan. (Waxan ula jeedaa, in gabaygu dhayalka maanta la baday ka baxo, oo nin laylyan karaya uuni halabsado.)

    Dhoodaan hore ayuu u yidhi:

    “Gogal-dhigadka maahmaahdu waa, gabayadaydaase
    Gucunkeeda maansadu halkay, gacan-toglaynayso
    (War) Gulaanti xididaysatiyo, Guurti laga yaabay
    Goljeex iyo mabda’ba way helaan, inay ku goobaane
    Ma gartaan gibbaankoo dhaniyo, jaale gorayciile!” {Garnaqsi, 1974}

    Sida aad u tibaaxdayna, Qamaan waxa uu qayb libaax ka ciyaaray cufnaanta gabayga oo uu maahmaahyo halhays leh ku camiray. U fiirso, gabay kastoo dhaxal gal ah, waxa uu ku baxsadaa waa maahmaahda uu xambaarsanyahay. (Maahmaahduna waa mid duluc dheer leh, oo dadku si sahlan ugu riyaaqi karaan maadaama oy waxay garanayaan loogu cabiro (metaphor); sida taa Qamaan ee gabayga “Dabuub” laga dheehan karo, tii Ina Suldaan ee gabaygii “Dix-dhagaxeed.” amaba sida tan Dhoodaan ee gabayga “Galaal-Xoor” ku dhex sharraxan.)

    Jidhidhico,
    —-“Hawo iyo hilow gacalo iyo hurud, nabdoon baa leh”—-

    • waa gabay qiima gal ah, horay ayaan uga baranay macalinka suugaan aad ucufan kuna sharaxanyihiin maah maahyo iyo miiganaan-gabay. kani waa sii anbaqaadkii uu noo asteeyay. abwaankeenii waynaa, saaxibul-xikma, somaliduna ay utaqaan inta gabayga u dhuun duleesha, qayskii -somalida oo loo la jeedo (qammaan bulxan yuusuf)

      tubtuu mara lahaa iyo halkuu tilmaamay waxaa maanta ku taaga oo toobiyahaas qaaday athiibka gabayga iyo dhaanka soomaliyeed waa macalin dhoodaan.

      qamaan hadaad akhrido gabayadiisa rag badan ooy isku xili ahaayeen tixahoodu waxay kula noqonayaa buraanbur iyo heelooyin, waxaana ugu wacan cufnaan la,aanta shakaalka iyo farshaxanka xaraga qaadasho ee gabay oo ay ka,aradanyihiin, saboolnima ka muuqato.

      gabayadiisai, talo aduun,dabuub,gadistay, haday sababi, iyo kuwa kaleba waxaan shaki kujir in uu horyaal yahay.

      dhoodaana waakan soo nooleeyay tiiqamaan ufiirsa gabaygiisa tusaale la yiraahdo.
      (NINKII TAAG LE WAA TII LAYIDHI TAHAR BUU GOOSTAAYE)
      (DHAGAX TAABASHO IYO TUUJIN IYO IN AAD TANTOOMAYSO SADEXDAAD ULA TAGTAA WAA ISUGU TAAGE)
      (NIN WAXII LA TOOSANI MIDBUU TUUR LA LEEYAHAY)

      AMA TAKARTII MAROODIGA LIQDAY ufiirso.

      tabuu laasahaaga udhurto iyo tuuga nin ujeeda hurduu kugu talaaliye ileen toos kuma yiraahdo.
      maska iligta kuugu tiifayee kaa turqaday dhiiga ,tashaq micida tidhi ileen kaaga turi maayo.
      nimaa teerigagiyo jeclay toori aad xidhato, tunbukh iyo ileen kuma yiraah tobanlayaal iibso.
      nin haltaa,a tiisii kadhigay ama takooraaya, tilmaantiyo markhaatiga ileen kuguma taageero.
      tukashad iblays kaa duwa iyo toobad keenimada, mata qaanid mooyee ileen khayr ma taban taabsho.
      inkastoo txgali ay rabtayoo tooxna lagu sheego, tabar xoogu ma ahee ileen garashadaa taagleh.

      waxba yaanan idinku daalin, wax dhamaanaya ma ahan waa bad wadaan lagu dhuray.

  6. Pingback: Cuddoonida Meeriska W/Q:- Idiris M. Cali | Dhaqanbile-Wada hadalka casriga ah

  7. Pingback: Cuddoonida Meeriska | Heeshi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s