Jaamac K. Cilmi / Masafo

“Bal car sheega…”: Jaamac Kediye Cilmi

Ramadaan Kariim

Shaqsiyaadka suugaanta, siiba maansadu, ay lafta iyo dhuuxa jibaaxday ayaa iyagu si taxaddar leh u daalacshay ceebta ummada Soomaaliyeed haysatay, haysatana maanta — kana faallooday cawaaqib xumadu inay gudaha ummada ka aloosanto. Waxaa maansoyahannadaa kamida abwaan Jaamac Kediye Cilmi oo hoga-tuska murtidiisu ka weecweecan danaha guud ee ummada Soomaaliyeed — kana kaaftoomay hoggaga ba’an ee holaca buufiya ee maansada. Waxa uu Jaamac markii uu dadka Soomaalida hoos u dayey ka yidhi: “Dadkani gaalana maaha; Muslin diinlena maaha,” waxa uuna jiiftadaa ay labadaa hal-ku-dhegyo ku jireen ka daba keenay masafo. Masafadan — oo uu abwaanku mariyey kadib markii ay rag fara badan wada murmeen (malahayga ku murmeen dulucda masafada oo magaceeda laga dhadhansan karo) — ayaa magaceedu yahay, “Bal car sheega gaallada; Sheyga aad ku dhaantaan,” waxayna si hufan uga waramaysaa mashaqada Soomaalida haysata, mar haddii dawlad wax kala wada la waayey.  Masafadan oo aan ka qoray cajal (muuqaal ah) abwaanka lagaga qabtay oo aan saabka Golkhatumo.com ka helooday ku soo dhawaada, sifiicanna  u dhugta.

Nimanyahow shaniyo toban          Qodoboo shuruudo ah
Oo shaliyo maantaa                      Baritona shalayto ah
Oodan shamalka saarteen            Shimbiruhuna ooyeen
Oo shaasha miidhanoo                Shawahaaddu kaw tahay
Haddaynaan ka sheexinee           Shurko waliba loo yahay
Bal car sheega gaalada                Shayga aad ku dhaantaan?

Shafkoo layska toogtiyo             Shirrabaadda geerida
Shibba nimaan waqiis gelin        Shaaraca in lagu dilo
Shilkaas aan dhamaan iyo           Shilada ladaynahayn
Haddaynaan ka sheexinee           Shurko waliba loo yahay
Bal car sheega gaalada                 Shayga aad ku dhaantaan?

Shaqsiyaad musaafura               Ama shaqo u soo baxay
Sharna aan samaynine               Shaambinaaya laamiga
Inaad shilimadoodiyo                Sharaftaba ka qaaddaan
Haddaynaan ka sheexinee         Shurko waliba loo yahay
Bal car sheega gaalada              Shayga aad ku dhaantaan?

Shacni male qabyaaladi              Shifo haddaad ka dhigateen
Shirriidnimiyo reer hebel            Shaalka haddaad u sidataan
Shanqarli’iyo dheeraad               Shabaabkii la kala dilay
Alayl iyo shaafiyaad[?]               Sheekaba ka loolayn
Waa in loo shihiidaa                  Sheer haddaad ku noqoteen
Haddaynaan ka sheexinee         Shurko waliba loo yahay
Bal car sheega gaalada              Shayga aad ku dhaantaan?

Xantu waa inoo shaah                 Beentuna sharaaboo
Shirkaa lala fadhiistaa                Shaadhna looma geliyo e
Shaki malehe waa camal            Shaydaanku leeyee
Haddaynaan ka sheexinee         Shurko waliba loo yahay
Bal car sheega gaalada              Shayga aad ku dhaantaan?

Xaasidnimadu waa shuush          Iyo shiilo naara ahe
Cudur sheelan weeyoo                Ku shakaalan uurkee
Shaybihiyo dhalaankiyo              Shabbadihiyo hooyada
Shiikha iyo shariifkaba               Inaad xumo ka sheegtaan
Ruuxii shabcaanaba                   Noloshiisa shuuftaan
Dad Iblayska shaabaha       Sheeddana Islaam ka ah
Bal car sheega gaalada              Shayga aad ku dhaantaan?

Dadku inuu shaqaystaa              Sharaftiisa weeyee
Wax shukrigu ku wacanyahay     Shilinkii xaalaal ahee
Shaababkiyo* ganacsiga             Wada shuurinaayaa
Shixnad kaliya ruuxii                  Shaariqa ka soo raray
Shardigiisu waa ribo                    Cirka lagu shareero e
Waxaad shuuqsanysaan              Rabi shaahid weeyee
Bal car sheega gaalada                Shayga aad ku dhaantaan?

Shanta iyo lixdii qodob                 Shuruudaha u waaweyn
Shadka iyo madkoodii                  Iyo shaqalladoodii
Shafeecadiyo camalkaba              Iyagaw shuhuudo e
Ma oga shareecaddu                    Inaan qaar shaxeexno e
Inaan siinka sheegtaan                Oo aad shiinka qarisaan
Haddaynaan ka sheexinee           Shurko waliba loo yahay
Bal car sheega gaalada                 Shayga aad ku dhaantaan?

Aadmigu shaxbuu dhigay               Sharcina waa samaysteen
Meelna kuma shakaallee                Duniduu ku shaacaye
Qodobada Shin-dhaladkay[?]         Ummaduhu ku shawraan
Shandad haddaad ku qarisaan       Ama aad shaadir gelisaan
Ama aad shallow ka tuurtaan        Iyo waliba shaanshaan
Bal car sheega gaalada                  Shayga aad ku dhaantaan?

Qabqablahaad shamaalkiyo             Dabaylaha u sheegtaan
Nin qudhihi dabuu shiday              Shook lagama qaado e
Haddaad qaar shibaab iyo             Shookada u noqotaan
Oo aad shaxaaddaan                    Shawaalkana ku xidhataan
Oo aad lana shaqaysaan              Badna shiqib tidhaahdaan[?]
Bal car sheega gaalada                Shayga aad ku dhaantaan?

Dawladnimada shaaximan              Shug markaad ka siiseen
Shiiqiseen xornimadii                     Iyo calankii shaac baxay
Nabaddii shoolad lagu riday           Dabadeed shib laga yidhiye
Shinnidii tarmi lahayd                     Shicibka xoolihiisii
Shabaabkiyo dhaqmaatiggii            Laga gaday shisheeyaha
Dhirteenii shuf tahayoo                  Geedihii la wada shiday
Shucuurtii wadaninimo                   Hadday tahay shadaaf madhan[?]
Bal car sheega gaalada                    Shayga aad ku dhaantaan?

Sabaannadan shiigee                     Shuftadiyo hunguriga ah
Qarniyadan shaqaaqada                Shibbanuhu ku xidhanyahay
Sharaftii aad dhigataan[?]             Shaag haddaanun riixayn
Oo aad shanshanda iyo               Shiluxyada is goysaan
Oo aad shabeel iyo                     Shisheeye isku noqoteen
Oo aadn shukaantiyo                 Shirka lagu heshiinayn
Bal car sheega gaalada              Shayga aad ku dhaantaan?

Shanqadhahan gumaysiga              Shalaqbaarka mooddeen
Sharad iyo illaa Qarab                    Shucaac haddaad ku noqoteen
Ood shabaqa hoosiyo                   Shillalka isa saarteen
Ood shaniyo toban sano              Waxba sheegi weydeen
Shuux inaan tihiin buu                Shucuubtiina ka arkayee
Inuu idinku soo shabo                Idinkana shukaansado
Oo uu shoodhayaal helo             Shoolada idiin galo
Shatigana idiin qoro                   Iyo waliba shaabuug
Sharaftiina weeyiyo                    Shaabbad idinku taala e
Bal car sheega gaalada               Shayga aad ku dhaantaan?

—————
[?] — ma hubo in sadaradaasu erayadii ku saxnaa wataan.
* — shops, ama dukaanno.

__________________________________________
Miisaanka (Tusmada) Guud ee (Badida) Meerisyada Maansadanu waa:

W W V W W | W W V W W

4 thoughts on ““Bal car sheega…”: Jaamac Kediye Cilmi

  1. Abwaan jaamac kediyo suugaantiisu waa mid maalin walba kor u socoto kuna gelinayso yididiilo cusub iyo inaad sii jeclaato, ilaahay ba
    waanka ha noo daay aamiin.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s