Careys C. Kaarshe / Saar

Wanka iyo Waraabihii

Ummad waliba suugaanteedu waa inay hummaag toosan ka bixisaa kolba sida ummadaasi u nooshahay iyo wakhtiga ay ku jirto intaba. Haddaynu soo qaadano hal maanso oo kamida maansooyinkii Careys Ciise Kaarshe (AUN), waxaa hubaal ah inaanu ka bogan karno taariikh lama iloobaan ah oo ummada Soomaaliyeedi soo martay—taariikhda ayaana mustaqbalka laga dhawrtaa.

Maansadan ayaa ah saarkii “weydiin iyo warcelin”-ta ahaa ee Wanka iyo Waraabaha u dhaxeeyay. Saarkaasi waxa uu diiradda saarayey nolashii aannu lahayn markii gumaysigii Reer Yurub ka kacay deegaannadeena, isla markaana waxa uu tilmaamayey go’aankii caddaa een kaga xayn-xidhanay “wadaaynimadii” hammiga waallida ahi ka keentay gumaysigii Reer Yurub—oo markaas iskeen annagu wax u qabsan karayney. Hayeeshee—sida saarka ku jirta—Reer Yurub (Waraabaha) ma aanun doonayn in uu faraha kala baxo ummada Soomaaliyeed iyo carrigoodaba; siyaasad ahaanna markii dambe aafe weyn ayaa naga soo gaadhay taas oo dad badanina sabab uga dhigi karaan burburkii qarankii Soomaaliyeed. [Hana iloobin in aan annagu qayb-libaax, haddaanu nahay Soomaali, mushkiladdaa ka qaadaney.] Haa, iskaaga ood wax u qabsato—dantaadana raacato—uun baad martabad sare ku gaadheysaa, hoos u noqodna hadalkeedba daa’!

 DHAGAYSO

wow looxaa lagu dhigaa
Ilaaheen Waaxid waay
wad waa loo wada dhintaa

wowgii kale waxan lahaa

tixdaa maanta an wadaa
waa weydiin iyo war-celin
ayaan waayaha kamida
waraabe iyo wan baa
is-weydaarsadey su’aal:

wankii baa yiri, “Waryaa
adduunkii waasacyoo
walaalowday Afrikoo
waswaaskii ima hayoo
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

wowgii kale waxaan lahaa:

wuxuu yiri, “Waatahaye
nabsigi waayahan maqnaa
inuu waaxdeyda yimi
aduun baa ii warramay
wadaaygey baa tahaye
aan waayo is-wehelinnee
wanyahow hay goyn wadnaha”

wowgii kale waxaan lahaa:

wuxuu yiri, “Waatahaye
kolkaad weydaysantahay
ninkii kuu gala wanaag
abaal baa laga warshaa
waxyeelaan kugu aqaan
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

wowgii kale waxaan lahaa:

wuxuu yiri, “Waatahaye
adduunyadu waayo ma leh
wanaag loogama irkado
ninna kama buuxsho weel
tan maantana waa wareer
wadaaygey baa tahaye
aan waayo is-wehelinnee
wanyahow hay goyn wadnaha”

wowgii kale waxaan lahaa:

wuxuu yiri, “Waatahaye
wuxuushnimadii ka baxay
wasiirraan leeyahay’o
wittaa ii mara arlada
wareerkaad sheegatanna
war iyo waayo uma lihi
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

wowgii kale waxaan lahaa:

wuxuu yiri, “Waatahaye
ma wiil iyo waalidki ba
ayaan kala weecan kala
axdigu waa weyn yahaye
ma labadii wacad dhigtoo
wallaahi isugu maraa
isweydaarsada xumaan?”
wadaaygey baa tahaye
wadaaygey baa tahaye
aan waayo is-wehelinnee
wanyahow hay goyn wadnaha”

wowgii kale waxan lahaa

wuxuu yiri, “Waatahaye
wilnimadaydii horiyo
haddoon waayeel ku dhacay
waxtar hadalkiisa daa
weylihi baad laasatoo
wax yar baa wiririgloo
waxaa haray waxarihii
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

wowgii kale waxan lahaa:

wuxuu yiri, “Waatahaye
walaalkay iga yar iyo
sidaad wiilkayga tahay
waqay kuu waaniyaa
adna ‘waan walaalatoho
gammuun waabey leh iyo
warmaad ii haysataa
wadaaygey baa tahaye
aan waayo is-wehelinnee
wanyahow hay goyn wadnaha”

[wowgii kale waxan lahaa:]

wuxuu yiri, “Waatahaye
ma weer baa ari cidlo ah
warjeef mooyee waxreeb
walaalow lagu wadaa
waxyeelaan kugu aqaan
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

wowgii kale waxan lahaa:

wuxuu yiri, “Waatahaye
agoon waageedi hore
wadka u aabbahod la tegay
wasaa la i saarayoo
wakiilkoodaan ahaa
walaayadi baan wadaa
intay weynaanayaan
warqaaddaa ii saxiix
wadaaygey baa tahaye
an waayo is-wehelinnee
wanyahow hay goyn wadnaha”

[wowgii kale waxan lahaa:]

wuxuu yiri, “Waatahaye
ma wiilkan anigu dhalo
aabbihi aad walamsataad
wasaayo u noqon kartaa
wareer weyn baa waddaa
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

[wowgii kale waxan lahaa:]

wuxuu yiri, “Waatahaye
sidaas kuu lama warramin
walaalow baan wadaa
warshado an kuu furiyo
wadaan soo jeexayaa
i weydii waxad rabtee
wadaaygey baa tahaye
an waayo is-wehelinnee
wanyahow hay goyn wadnaha”

wowgii kale waxan lahaa:

wuxii yiri, “Waatahaye
ninkii kaa weyn wax badan
haddii aad waanisaa
asuu didaa wanaag
xumaan baa lala wadaa
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

wowgii kale waxan lahaa:

wuxuu yiri, “Waatahaye
webigi adigaa fadhiya
wadaan maran baan wataa
ilmihi wuu’day hayaan
wajigu waa weynyahaye
war nacab hay odhan walaal
wadaaygey baa tahaye
an waayo is-wehelinnee
wanyahow hay goyn wadnaha”

wowgii kale waxan lahaa:

wuxuu yiri, “Waatahaye
wax dhan adigooo wirxoo
ilmuhu ay kuu wabxeen
kuweyguna ‘Waawareey!
war aabbow’ daa hayaan
wakhtigu ii soo wareeg
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

wowgii kale waxan lahaa:

wuxuu yiri, “Waatahaye
barida waadiga warfiyey
lag baa ii walalac yiri
micidu wiiq bay i tiri
hunguri weyn baa i wada
wax baa ii laaban wali
as-se waa weyraxdaye
bal waagu hanoo baryee
wadaaygey baa tahaye
an waayo is-wehelinnee
wanyahow hay goyn wadnaha”

wowgii kale waxan lahaa:

wuxuu yiri, “Waatahaye
Waduuxaa iyo Walleyl
Wasaafaad iyo Wadhuur
Wanajmi idaa hawaa
Walcasri iyo Weylun iyo
toddobo iyo tobanka wow
walwal-tirayaal la dhaho
Wattiin goortaan cuskadey
Ilaaheey Waaxidaa
xaqayga ii wershoo
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

wowogii kale waxan lahaa:

wuxuu yiri, “Waatahaye
Waduuxaa iyo Walleyl
Wasaafaad iyo Waduur
Wanajmi idaa hawaa
Walleyli haddaad taqaan
wadaad baad ii tahaye
waddada loo maro sirtiyo
war beena anaa haye e
kac an welimaysannee
wadaaygey baa tahaye
an waayo is-wehelinnee
wanyahow hay goyn wadnaha”

wowgii kale waxaan lahaa:

wuxuu yiri, “Waawareey!
WADDANI baan ahay anigu
ma reerkaan waardiyiyo
‘wadeeco Alloy’ lahaa
waxdhan weerka u xirtoo
an kaa waabinahayaan
wadaageynaa waryaa?
wareer weyn baad waddaa
wanaag baan kuu waddacay
warkuna waa koobanyahay
wadaaynimo kaama rabo
waddanka annaa iska leh
an kala weydaarrane e
waraabow maalin wacan”

__________________________________________
Miisaanka (Tusmada) Guud ee Meerisyada Maansadanu waa:

V W W W V W

6 thoughts on “Wanka iyo Waraabihii

  1. Pingback: Cuddoonida Meeriska W/Q:- Idiris M. Cali | Dhaqanbile-Wada hadalka casriga ah

  2. Pingback: Cuddoonida Meeriska | Heeshi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s